一

一天過一天

一天過一天， 一天過了又一天

身軀無洗全全仙， 行到溪邊洗三遍

毒死烏魚數萬千， 夭壽死囝仔撿去煎

吃了無死麼著拖屎連

一本萬利

一本萬利，二人同心

三元及第，四季平安

五榖豐收，六合同春

七子團圓，八仙過海

九世同居，十全富貴

一放雞

一放雞，二放鴨

三分開，四做堆

五搭胸，六拍手

七輪球，八摸鼻

九拉耳，十摃腳

十一摸土腳

十二攏總捎（ㄙㄚ）。

一的碰米香

一的碰米香，二的炒韭菜

三的強強滾，四的炒米粉

五的五將軍，六的做大官

七的跂在看，八的剩一半

九的火燒山，十的蚵仔煮麵線。

一隻老鼠

一隻老鼠仔雜死人，一雙鞋咬破幾咯孔

來去街路買貓公，掠老鼠仔來鼻（聞）香

老鼠仔肉白溜溜，煮乎爛朽朽

阿公仔蹺腳撚嘴鬚，吃肉配燒酒。

月光光

月光光，早早擔水落柑仔園

柑仔種四欉，四姊妹仔真成人

大的嫁福州，二的嫁金樹，三的嫁海岸，四的嫁內山

大的返來金馬鞍，二的返來金桶盤，三的返來金交椅，四的返來氣半死

平平是姊妹，甲我嫁山上，三當糜煮甲爛爛爛，吃菜脯，配鹹菜干

月娘月光光

月娘月光光，阿公仔掘菜園

菜園掘鬆鬆，阿公仔欲種蔥

種蔥不發芽，阿公仔欲種茶

種茶不開花，阿公仔種菜瓜

菜瓜不結子，掠老婆仔來打死

月娘光微微

月娘光微微，賊仔偷掠豬

偷掠七八隻，順續偷挖壁

青盲的有看見，啞口的大聲嘩

跛腳的走去追，瘸手的走去掠

歹心黑碌肚

歹心黑碌肚

欲死初一十五，欲埋風和雨

欲撿骨，尋無墓

做好心，行好路，後擺才有好前途

水雞官

水雞官，牽金線，牽馬上南山

水雞官，牽金線，牽馬上南山

南山無馬草，實在無地走

牽來去九嬸婆仔因（他）的門腳口

火金姑

火火火金姑，飛呀飛落土

火火火金姑，飛呀飛落土

坐坐坐我的船，打我的鼓

吃我清飯，配我的鹹菜脯

對阮門口過，哎喲掠來通做某

火金姑

火金姑，來吃茶

查燒燒，配芎蕉

芎蕉冷冷，配龍眼

龍眼會開花，瓠仔換冬瓜

冬瓜好煮湯，瓠仔換粗糠

粗糠欲起火，九嬸婆仔賢吹粿

牛奶糖

（生）先生我的腹肚威威鑽

（師）吃著什麼貨？

（生）牛奶糖

（師）什麼所在吃？

（生）甘蔗園

（師）到底吃外濟？

（生）無地算

打手刀

打手刀，煮茼蒿

小妹仔欲嫁欲如何？

想來想去真煩惱

趕緊寫批給兄哥

大哥送金鎖，二哥送瑪瑙

大嫂送鳳釵，二嫂送繡鞋

阿公阿媽送什貨？

一頂紅眠床，一領被

正月正

正月正，請子婿入大廳

二月二，台（殺）豬公來謝土地

三月三，桃子李子勻頭擔

四月四，桃子來李子去

五月五，龍船鼓水內渡

六月六，踏水車打碌碡

七月七，龍眼黑榭榴毖

八月八，牽豆藤挽豆莢

九月九，風箏滿天哮

十月十，冬瓜糖酸落餅盒

十一月，年兜邊人搓圓

十二月，穿新衫通過年

白翎鷥

白翎鷥，擔柳枝

柳枝重，擔箸籠

箸籠輕，輕擔草茵

草茵通起火，老婆仔透早起來炊碗粿

白翎鷥

白翎鷥，車糞箕

車到溪仔墘

跌一倒，撿到一仙錢

買大餅，分大姨

大姨嫌不夠，呼雞喊狗來咒詛

咒詛無，投姆婆

姆婆去作客，投大伯

大伯去賣龜，投姊夫

姊夫賣粗紙，投來投去交著我

害我心肝蹦蹦彈，雞母換雞囝

雞囝會生蛋，有米兼有飯

吃清吃濁

你是欲吃清，也是欲吃濁

緊想看覓，緊想看覓

欲吃清，送你去媽祖宮

欲吃濁，送你去尋嬸婆

回娘家

有爸有母初二三

無爸無母鬥擔擔

有兄有弟初三四

無兄無弟看人去

好子兒

大雞公，咯咯啼

做人的子著早起

舉掃帚，去掃地

提桌布，拭桌椅

進學堂，勤讀詩

敬老尊賢好教示

老爸老母尚歡喜

延年益壽吃百二

自動車

自動車，坐阿舍

囝仔人，牽墨鏡

因（他）老爸，做保正

煙吹頭，槓昧痛

坐牛車

坐飛機看天頂

坐大船看海湧

坐火車看風景

坐汽車錢較省

坐牛車順續挽龍眼

拍手刀

拍手刀，應銅鑼，丈母厝，好彳亍

彳亍善，食雞胗，彳亍厭，食甘蔗

甘蔗甜，生後生，後生做滿月，擔田坏

田坏重，擔箸籠，箸籠輕，擔菅榛

菅榛浮，要觸牛，牛要觸啥人，觸親家公仔

親家公仔要創啥貨

要食飯，飯猶未煮

要食米，米猶未挨

要食雞，雞猶未台

要吃鳳梨，鳳梨猶未買

要食老婆仔尻川皮（第四聲）

油炸粿

油炸粿，杏仁茶

見著警察磕磕爬

碗公弄破四五個

警察掠去警察衙

叫阮雙腳站齊齊

哎喲喂，大人啊

阮後擺不敢賣

阮後擺不敢賣

阿才

阿才阿才，天頂跋落來

跋一下有影真厲害

有嘴齒，無下頦

有目周，無目眉

有腹肚，無肚臍

實在真悲哀

查某囡仔嬰

查某囡仔嬰，捧茶請先生

先生無目周，夯鉸刀剪榭榴

榭榴射低低，蒙棕蓑戴大笠

大笠好遮雨，台豬翻豬肚

玲瓏鼓

玲瓏鼓，玲瓏鼓

檢（存）錢欲娶某

某生子，子生孫

孫看鴨，鴨生卵

卵請人客，客放屎

屎沃菜，菜開花

花結子，子搾油

油點火，火炊粿

粿無餡，玲瓏玲瓏玲瓏鎈

紅田嬰

紅田嬰，紅貢貢

騎牛騎馬來培墓

芎蕉鳳梨，牲禮酒菜

大兄點香，大家來拜

紅田嬰，紅寶貝

騎牛騎馬來挹墓粿

紅龜無夠，牲禮總掃

豆乾雞蛋，提提來湊

食拔仔

食拔仔放銃仔

食袖子放蝦米

食龍眼放木耳

食蕃薯放臭屁

烏秋

烏秋烏秋嘎吱啾

死雞仔肉嘛抆豆油

豆油豆油捧咧走

烏秋烏秋嘛嘛哮

烏頭仔

車烏頭仔車，車甘蔗

頂頭坐一個憨阿舍

流鼻蚵，掛目鏡

腹肚枵，坐未正

跋落來，唉唉痛

臭頭一寸釘

臭頭的一寸釘，扛去媽祖宮

媽祖咧無閒，扛去觀音亭

觀音媽，面笑笑

扛去大眾廟；大眾爺

面黑黑，扛去草仔埔

草仔埔，草長長

扛去蕃薯園，蕃薯園掘鬆鬆

扛去磅米香

草螟仔公

草螟仔公，穿紅褲

趕牛去賣布，賺錢通娶某

新娘仔大腹肚

正月生查甫，二月生查某

打銅鑼，弄大鼓

茶燒燒

茶燒燒，配芎蕉

茶冷冷，配龍眼

龍眼乾，開雨傘

人點燈，你來看

看新娘，沖沖滾

插紅花，抹水粉

金蔥鞋，鳳尾裙

帥當當，笑文文

庵埔蟬

庵埔蟬，哮咧咧

哮欲請人客

你台（殺）豬，我台羊

打鑼打鼓娶新娘

新娘帥當當，草螟仔弄雞公

雞公匹沸跳，草螟仔死翹翹

掩咯雞

掩咯雞，走白卵

誰你吃，隨你鑽

放咯雞仔去尋卵

尋若著，放你去

尋無著，摔竹刺

牽尪仔

牽尪仔，補雨傘

牽豬哥，四兩半

牽新娘，出來看

新娘仔，帥當當

褲底破一孔，後壁磅米香

蚵爹蔥管

炸蚵仔爹，蔥管炸

鼻（聞）著香噫噫

愛吃擱沒錢，伸手就加拈

阿狗兄，有看見

手提刀仔箭，狗咧吠

柺仔托托去，掠去吃官司

普渡來

普渡來，欲做戲

吩咐三，吩咐四

吩咐親家親母來看戲

對竹腳，厚竹刺

對溪邊，驚跋死

對大路，嫌費氣

那無都攏覓（不要）去

黑貓

黑貓黑貓飼未大

明仔早仔人要娶

新子婿，二十外

穿長衫，疊馬褂

圓仔花

圓子花，不知醜

大紅花，醜不知

來來來，試看覓

圓仔花，小粒尚實在

大紅花，真大扮，人人愛

搖啊搖

搖啊搖，搖到內山去挽茄

挽外濟，挽一布袋

也通吃，也通賣

也通給嬰仔做度膵（周歲）

新娘仔不通哭

新娘仔新娘仔不通哭

留惦阮兜吃中午

暗班車粘治到

一目睨仔到您兜

落大雨

落大雨，透大風

烏天地暗陳雷公

門口水漣漣，有路行未通

落大雨，透大風

雞仔鴨仔驚雷公

蔤去亭仔腳，驚到憨憨憨

飼雞

飼雞通顧更，飼豬通還債

飼牛通拖犁，飼狗通吠暝

飼後生，留惦厝內底

飼查某子，總是別人的

頭

一個葫蘆七個孔

一孔黑弄弄，二孔會滴水

二孔會流膿，另外一孔會噴風

也有二孔昧震動，三不五時做眠夢

不知到底有外重

龍眼花

龍眼花，龍眼花，瓠仔換金瓜

金瓜好煮湯，瓠仔換粗糠

粗糠通起火，嬸婆欲炊粿

炊甲臭火焦兼著火

嬰仔乖

嬰仔乖乖不通啼

您母仔來去挽蕃薯

飼大豬，通賺錢

糴米煮飯來飼你

嬰仔搖

嬰仔嚶嚶搖，搖到三板橋

大麵雙碗燒，紅龜軟燒燒

肉丸子參胡椒，豬腳雙邊留（切）

嬰仔嚶嚶惜，一暝大一尺

嬰仔嚶嚶睏，一暝大一吋

舉鉸刀

舉鉸刀，煮應菜

開大門，剝芥菜

剝幾葉，剝五葉

一葉青，送先生

一葉費（ㄆㄨˋ），送官府

一葉紅，送丈人

一葉赤，送隔壁

一葉烏，送大姑